आता आता कोठे!
आता आता कोठे मना
वाटे पडावे बाहेर !
आणि धुंडाळून यावे
सारे आकाषाचे घर !
आम्रमंजरी प्रमाणे
जरा मोहरून यावे
मृगाचिया मातीपरी
पार गंधाळुन जावे !
तुझे नाजुक ते दिस
आता विसरून थोडे
व्हावे वाऱ्याच्या संगती
दिलखुलास मोकळे !
हसू फुटल्या रानात
वृक्ष लतांच्या संगती
हिर्वळुनिया सांगावी
पानापानासवे नाती !
निळा सागर अथांग
डोळा भरून पहावा
आणि टिमटिमणारा
वर तारकांचा थवा !
आता आता वाटताहे
शुभ्र चांदण्यात न्हावे
सृष्टि लावण्याचे मोल
गात्रा-गात्रांना कळावे !
-मनोज बोबडे
कोणत्याही टिप्पण्‍या नाहीत:
टिप्पणी पोस्ट करा